• banner'

        一九六六年,十七歲,我由珠海游水到澳門,足足游了六小時,然後再屈蛇到香港。來到香港,我隻字唔識又冇書讀,就更覺做人要有一技之長,所以十八歲那年,去了周啟邦老竇周錫年爵士都光顧的式雅洋服鋪做學徙,兩年後升做師傅。由於洋服叫「鬼衣」,所以裁縫和洋服從業員都被稱為「鬼衣佬」,而洋服呢行就叫「鬼衣行業」。林海峰爸爸都係有名的「鬼衣佬」,佢今年七十多歲,係師傅輩。

        打工打了十三年,三十一歲終於輪到自己在旺角砵蘭街開洋服鋪。當時鋪頭對面就係文華戲院,好多明星像成龍都會趁首映開始前入嚟逛下訂番一兩套。依家劉德華、任達華、司徙華、關禮傑、謝霆鋒都係我啲客,呂良偉仲試過拎埋里安納度著過嗰款來叫我跟住做。我同劉德華仲會互相切磋,睇下點樣配搭先至係最靚。

        九七年前,我每月差唔多有十萬緡生意,但金融風暴後,就跌至四萬,跌了六成。旺角兩間分店都要關門大吉,依家執剩油麻地廟街呢間。好彩去年林海峰為李克勤的《度身訂造》大碟諗唱片封面,偷偷地影了香港五六間洋服鋪,然後把相片拎去問老竇邊間好,佢老竇話我呢間夠正統,真係為人度身訂造,唔係賣現成西裝,所以就揀咗我呢間鋪來影唱片封套。咁啱克勤係我客仔,咪一拍即合,我仲上埋鏡添。自從嗰次曝光後,生意即時多咗兩成,今次真係要多謝克勤,多謝林海峰嘞!

1